2. கலைகளில் பரதம். (494)

 

*

 கலைகளில் பரதம்.

*

பரதமுனிவர் அறிமுகமாக்கிய உயரிய கலை
பாவம், ராகம், தாளமிணைந்த சொல்
தேவதாசிகளின் சதிராட்டத்தின் நெறிப்படுத்திய
வடிவம். சின்ன மேளம், கூத்தாடல்
தாசி ஆட்டம். எழுபதாண்டுகளாகப் பரதமானது.

*

முகபாவனைகளில் நவரசங்கள் பிறக்கும் அழகு
அகம் குளிரச் செய்யுமுடல் மொழி.
முத்திரையிடும் கைவழி கண்கள் செல்ல
கண்கள் வழியோடிதயமும் செல்லும் இன்பவழி.
பாவரசமிணைந்த அறுபத்து நான்கு கலைகளிலொன்று

*
.
சஞ்சலமின்றிச் சலங்கையைக் கண்களிலொற்றிப் பூசித்து
அஞ்சாது அழகு மயிலாக ஆட
கொஞ்சிடும் சலங்கை தவறாது தாளமிட
வஞ்சியவள் சந்தத்தில் பரவசமாய் ஆடுவாள்.
கெஞ்சிடும் மனம் இன்னொரு தடவையென்று.

*

கண்கள் கருவண்டாய்ச் சுழன்று மொய்க்க
அண்ணாவியசைவில் மேடையில் கால்கள் பாவாது
வண்ணமாய் ஒயிலாயாடி அபிநயத்தில் எண்ணத்தில்
கண்ணன் லீலைகள் விரிந்திட அழகுப்
பெண் ராதையைத் தேடுவதோ மீயழகு.

*

உடல், மனம், ரசனைக்குப் பயிற்சி
உன்னதத் தென்னிந்தியர் தமிழர் நடனம்
இரண்டாயிரம் ஆண்டுகளின் முன்னைய உருவாக்கம்.
அடவு, ஐதி, பாடல் நட்டுவாங்கமென
இசைக் கருவிகளின் கூட்டுக் களியாடலுமாகும்.

*

வேதா. இலங்காதிலகம். டென்மார்க். 26-5-2017

*

வேறு – குறுங்கவிதை.

பாவம் உணர்ச்சியை, ராகம் இசையைப் 
பாவும் பரதமிந்திய புராதனக் கலை.
சிவன் மகிழ்வின் உச்சத்தில் ஆனந்தத்தாண்டவமும்
அழிக்கும் கடவுளாக ருத்ரதாண்டவமும் ஆடுகிறார்.

*

அபிநய வழி செய்தி பரிமாற்றம்
சுபசுரம் சதங்கை ஒலி பின்ன
செம்பஞ்சுக் குழம்பிட்ட பாதங்கள் சதிராட
அழகு மயிலென ஆடும் பரதம்.

*

வேதா. இலங்காதிலகம். டென்மார்க். 31-5-2017

*