அருவியின் இசை
கொட்டும்; அருவியின் இசை
தட்டும் தாளமான விசை
எட்டுச் சுற்றும் ஓசை
கட்டு கவிப் பாட்டிசை
மலைப் பால் வடிவது
மலைத்திட வைக்கும் உறவிது
கலைத்திட்ட வெள்ளைக்காரி கூந்தலாக
மலையரசன் பட்டுச் சால்வையாக.
மானிட நாகரீக வாடை
மேனிலைக்கு வளர்த்த ஓடை
வனப்பெண் காற்சலங்கை நீர்வீழ்ச்சி
அலைச் சடுகுடு தெய்வீகம்.
2016
பள்ளம் மேடு தெரியாது
கள்ளம் ஏதும் இன்றி
துள்ளிப் பாய்ந்து வீழும்
துகிலா, பாலா நீலமா!
‘சோ’ வென்றா அன்றி
‘ஓ’ வென்று சலசலத்துக்
கொட்டும் இசை நாதமா!
முறுக்கேற்றி உருவேற்றும் கீதமா!
உன் அருவி இசையை
நான் மட்டுமா இரசிக்கிறேன்!
வண்ணத்துப்பூச்சியுடன் பறவைகளும்
திண்ணமாய் மரங்களும் பயிலுகின்றன.
உன்னைப் பார்க்கும் பரவசம்
என்ன வியப்பு இது!
எங்கிருந்து கொட்டுகிறாய்
மலைமங்கை புதையற்பொதி கிழிந்ததா!
2021
வேதாவின் வலை.2 