20.கவிதையுடன் பாரதிதாசன் சான்றிதழ்.(புதியதோர் உலகு செய்வோம்)

novenber 26-2017

சங்கேமுழங்கு பாரதிதாசன் கவிதைகள்-20

Zegu Zegu‎சங்கத்தமிழ் சான்றிதழ் பதிவு குழுமம்

வாழ்க தமிழ்மொழி வாழ்க தமிழ்மொழி வாழ்க தமிழ்மொழி யே. வானம் அறிந்த தனைத்தும் அறிந்து வளர்மொழி வாழிய வே.

சங்கத் தமிழ்க் கவிதைப் பூங்காவில்

28/02/2017 நாள் நடந்து முடிந்த புதியதோர் உலகு செய்வோம் எனும் தலைப்பில் பாரதிதாசன் போட்டியில் 
கவிதை எழுதிய

கவிஞர் [ இலங்கா திலகம் வேதா]
சிறப்புச் சான்றிதழ் வழங்கி கெளரவிக்கப் படுகின்றார் கவிதை எழுதிய அனைத்து பாவலர்களுக்கும் வாழ்த்துக்கள்.

சிறப்பான கவிதைகளை தேர்வு செய்த நடுவர் கவிஞர் கோவிந்தராஜன்பாலு அவர்களுக்கும் வாழ்த்துக்கள்

தலைமை நிர் வாகி ந. பாண்டியராஜன் *********************************

*

புதியதோர் உலகு செய்வோம்.

*

புதியதோர் உலகு செய்வோம்
விதியதை மாற்றி நெய்வோம்.
இதிகாசங்கள் காலத்திற்கும் பேச
மதியதின் செயற்பாட்டை முடுக்குவோம்.

பஞ்ச மகா பாதகங்கள்
நஞ்சுடைய செயலெனப் பாலகருக்கு
பிஞ்சு வயதிலேயே புகட்டுவோம்.
நெஞ்சிலே நன்னெறிகள் ஊட்டுவோம்.

மரங்கள் நட்டு பாதுகாத்து,
வரமெனும் மழை பெற்று
தரமுடை மண் வளத்தைக்
கரம் குவித்துப் பெறுவோம்.

மூடநம்பிக்கைகள் கேடுகள் அழித்து
ஆடவரோடு பெண்டிர் கல்வியையும்
தேடிடக் கை கொடுப்போம்.
கூடிடுவோம் நீதியே கொடியாக.

ஓற்றுமையாம் கூட்டுறவு பெருக்கி
கற்றவரான உலகு அமைப்போம்.
அற்புதச் சுகாதாரம் உயர்த்துவோம்.
சுற்றம் பேணிச் சுகமாவோம்.

அன்பே தாரக மந்திரமாகி
வன்முறை அற்ற உலகை
தென்புடன் இணைந்து உருவாக்குவோம்.
இன்பமான புத்துலகு அமைப்போம்.

வேதா. இலங்காதிலகம் டென்மார்க். 

19.கவிதையுடன் பாரதிதாசன் சான்றிதழ்கள்.(விழிகூறும் மொழி கேளாய்)

november 25 2017

சங்கே முழங்கு பாரதிதாசன் சான்றிதழ் -19

வாழ்க தமிழ்மொழி வாழ்க தமிழ்மொழி
வாழ்க தமிழ்மொழி யே. 
வானம் அறிந்த தனைத்தும் அறிந்து
வளர்மொழி வாழிய வே..

வணக்கம் கவி உறவுகளே..

சங்கத்தழிம் கவிதைப் பூங்கா குழுமம் நடத்திய 24/02/2017 தின பாரதிதாசன் போட்டியில், விழி கூறும் மொழி கேளாய் என்ற தலைப்பிற்கு கவிதை எழுதி வெற்றிபெற்ற கவிஞர் வேதா இலங்காதிலகம் அவர்களை குழுமம் சார்பாக வாழ்த்தி மகிழ்கின்றோம்.

விழி கூறும் மொழி கேளாய்

*

மொழியற்ற என் ஆழ்ந்த காதல்
விழி கூறும் மொழி கேளாய்!
அழிப்பான் இல்லாத வட்டத்தில் விரியும்
எழில் காதல் மன்மத அம்பிது.

விழி என்ற சிற்பி செதுக்கும்
இழிவற்ற உன்னதக் காதல் கலையிது.
செழித்திடக் கடைக் கண் காட்டு!
பொழிவுடை வாழ்வு விரித்துக் களிப்போம்.

மொழிப் பின்னல் தொடர்பு, உயிர்
வழி செல்லும் அற்புதப் பயிர்!
கொழித்த உறவு பெருகும் நந்தவனம்
விழி கூறும் மொழி இன்பமானால்!

காந்த விழி அன்பால் என்னை
ஏந்தட்டும்! விலையில்லா உறவு இது!
வந்து தந்திடுவாய் காத்திருப்பேன் உனக்காக.
சொந்தமாக்கு கண்ணாளன் என்ற உறவை!

18.கவிதையுடன் பாரதிதாசன் சான்றிதழ்.(

november 23 2017

சங்கேமுழங்கு பாரதிதாசன் சான்றிதழ்-18

Zegu Zegu‎சங்கத்தமிழ் சான்றிதழ் பதிவு குழுமம்

Admin · 30 January near Periyaneelavanai, Sri Lanka ·

வாழ்க தமிழ்மொழி வாழ்க தமிழ்மொழி
வாழ்க தமிழ்மொழி யே. 
வானம் அறிந்த தனைத்தும் அறிந்து
வளர்மொழி வாழிய வே.

சங்கத் தமிழ்க் கவிதைப் பூங்காவில்
27/01/2017ம் நாள் இந்த உலகில் செழித்த இனமா இது
என்றதலைப்பில் நடந்து முடிந்த சிறப்பு கவிதைப்
போட்டியில்  கவிதை எழுதிய கவிஞர்

[வேதா . இலங்காதிலகம்]சிறப்புச் சான்றிதழ் வழங்கி கெளரவிக்கப் படுகின்றார்

தலைப்பு ஆரம்பம்:- உலகில் செழித்த இனமா இது
முடிவு:- இந்தப் பிறப்பு வேண்டாம் வெளியேறுகிறேன்.

உலகில் செழித்த இனமா இது!
பலரின் கேள்வியிதை அழிப்பது தோது
நிலவுலகில் அரிதான பிறவி மானுடம்
பல திறமை வளர்த்துயர்ந்தால் சீரிடம்.

அங்கங்கள் குறைவின்றிப் பிறத்தல் அரிது.
முங்கித் தமிழ் முத்தெடுக்கக் கருது.
மங்காத மொழிச் சிகரமேறல் பெரிது.
பங்கமற்று அறவழி வாழ்தல் விருது.

நன் மனக்கட்டுப்பாடு, சிந்தனைத் திறமை,
நன்னெறி, நற்செயலோடு இறை பக்தியை 
தன் வழி சிறக்கக் கொள்வார் கல்வியாளர்.
வன்முறை வாழ்வாளரை மாற்றும் பண்பாளர்.

மனித சக்திக்கு இணையே இல்லை.
மனிதன் இறைவனுக்குச் சமம். தவறுவோரை
இனிய வழிக்கழையுங்கள்! தீய கூற்றன்றோவிது
இந்தப் பிறவி வேண்டாம் வெளியேறுகிறேன்!

வேதா. இலங்காதிலகம் டென்மார்க். 27-1-2017

17.

17.கவிதையுடன் பாரதிதாசன் சான்றிதழ்கள்

6-7-2018

கவியுலகப் பூஞ்சோலை பாரதிதாசன் சான்றிதழ்கள்-17

நேசம் குழைந்த தூவான மழையே

பாசம் கொண்டு பன்னிர் தெளிப்பாய்.
வாசம் மண்ணோடு வளமாகத் தருவாய்.
நேசம் கொண்டு பாலரை நனைப்பாய்.
தேசம் செழிக்க தேவையை நிறைவேற்றுவாய்.
00
மத்தளம் கொட்டி மின்னலோடு வந்து
கைத்தலம் பற்றுவாய் கவின் பூமாதேவியை
பொத்தலான வானம் தூவும் நீரை
சொத்தாகத் தாங்குவார் உழவர் கூட்டமே.
00
வெட்டவெளித் தூசியை அடக்கிக் கழுவி
கிட்டே வா கடதாசிக் கப்பலிட
கொட்டமடிக்க நாமும் ஒன்று சேருவோம்.
தொட்டிகள் நிறையட்டும் தொழுவோம் நீர்சேமிப்பை
00
வானக் கூட்டுமாறு கழலுதலாகி விழுகிறதோ!
தானமாகும் ஈர்க்குக் குச்சிகள் இவையோ!
வானத்தோடு யார் சண்டை யிட்டது!
வானத்துப் பன்னீர்க் குடம் உடைந்ததோ!
00
பூமாதேவி என்ற வரை தாளில்
பூமழை நீர் ஓவியங்கள் செய்து
பூக்கள் பூக்க வைக்கும் தூவானமே
சாயக்குப்பிகள் கரைத்து மாயக் கரைசலிடுகிறாய்!
00
வேதா. இலங்காதிலகம். டென்மார்க். 6-7-2018

15. கவிதையுடன் பாரதிதாசன் சான்றிதழ்கள்.

June 6 2019

கவியுலகப் பூஞ்சோலை பாரதிதாசன் சான்றிதழ்-1

அன்பிற்குமுண்டோ அடைக்கும் தாழ்

(அன்றுதல் – சினத்தல். அன்றினார் – பகைவர்)

கன்னித்தமிழ் போல் கொடுத்தலும் எடுத்தலும்
கன்னலன்பிற்கு முடியும், குனிதலென்பதே யில்லா
குன்றி மணியன்பும் குன்றளவு பயனுடைத்து.
தன்னடக்கம் நிறையன்புச் செயற்பாடு, தன்னலமற்றது.

மன்பதையை மன்றத்தில் பெருமையாக்கும் நட்பாம்
பொன்னுக்கு நிகராமன்புக்குமுண்டோ அடைக்கும் தாழ்!
அன்பற்றோருக்கு ஐம்புலன்களாலும் பயன் இல
என்புதோல் போர்த்திய தென்பவர் வள்ளுவர்.

இன்பித்தல் நட்பினால் நேசமுடன் பெருகிடும்.
அன்பான இன்சொல் நற் பழமே
ஒன்று கூடுதலும் அன்பான நிகழ்வே!
ஒன்றாமை நோய் அன்பின்மையால் பெருகும்.

அன்றுதல், அடம், அகங்காரம், துரோகம்
அன்பினை அடைக்கும் தாழ் காண்!
அன்பினால் உலகை ஆளலாம் கேள்!
அன்பில்லாதோன் சுயநல அவகுணம் நிறைந்தோன்.

அன்றினாரையும் இணைக்க அன்பால் முடியும்.
வன்மையற்ற நேசிப்பு இன்னலற்ற தெய்வீகம்!
துன்பம் அழிப்பது இன்னமுத அன்பே
அன்பினாலான இன்சொல்லும் பெரும் தர்மமே

உன்மத்தம் உடையவன் குறை அன்பின்மை.
மேன்மை உயர்ச்சி பாசத்தால் நிறையும்.
மென் தலைகோதும் உணர்வும் அன்பாலிணைவதே
அன்பூர மனமிளகும் எறும்பூரக் கற்குழிதலாய்.

4-6-2018

14.கவிதையுடன் பாரதிதாசன் சான்றிதழ்கள்.(நின்னையே ரதியென்று)

June-6 -2019

கவியுலகப் பூஞ்சோலை பாரதிதாசன் சான்றிதழ் – 14

நின்னையே ரதியென்று நினைத்தேனடி

நின்னையே ரதியென்று நினைத்தேனடி

அன்னையை நிகர்த்த உன்னையே
என்னவளாக எண்ணி உருகுகிறேன்.
பொன்னையே ஒத்த கணங்கள்
உன்னையருகில் கொண்ட மணித்துளிகள்.

மென்னகை ஒரு வேதமென்றால்
மென்னடை ஒரு அன்னமாகும்.
மென்மையாம் உன் மேனியும்
புன்னகை வதனமும் ஒரு
நன்கொடை எனக்கு அறிவாய்.

விண்ணின் ரதியன்று நீயென்
மண்ணின் ரதியடி மூங்கிலிசைப்
பண்ணின் தேவராகச் சாரலடி
எண்ணத்தில் நீ உயர்
வண்ணத் தமிழுக்கு நிகரடி.

என் வாழ்வின் மதியே
தேன் அனைய நதியே
வான் ஒத்த மதியே
என்னை உயர்த்தும் நிதியே
கன்னம் சிவக்குதேன் ரதியே!

மன்மதன் நானாவேன் உனக்கு
முன்னவனுக்கு நன்றி கூறுகிறேன்.
மன்னுயிர்களுக்கு உதாரணமாய் இருப்போம்
முன்னோடியாக வாழ்ந்து காட்டுவோம்
அன்பில் தேடலை இதிகாசமாக்குவோம்.

1-6-2018

13.கவிதையுடன் பாரதிதாசன் சான்றிதழ்கள்.(முற்றத்து முழுநிலவே.)

11-6-2018

கவியுலகப் பூஞ்சோலை பாரதிதாசன் சான்றிதழ்-13

முற்றத்து முழுநிலவே

(அற்றம் – துன்பம் .எற்றும் – இன்னும்.
எற்றம் -மனத்துணிவு கொற்றவி -அரசி )
00
அற்றம் இன்றி இன்பமே
எற்றும் தரும் என்னரும்
முற்றத்து முழுமதியே
உற்றறியும் என்னுயிரே
எற்றம் தூவும் மழைமுகிலே
00
ஒற்றடமிடும் ரோசா இதழே
கற்றடம் மின்னச் செய்யும்
இற்றை முழு நிலவே
குற்றமற்ற குளிர் திங்களே
கொற்றம் தருமென் துணையே
00
கொற்றவையென் வாழ்வில் நீயே
கொற்றவியென் இதயத்தின் பாதியே
சற்றும் விலகாயென் சதியே
சிற்றாடை அற்றைத் தேவதையே
சிற்றடி மெட்டியொலி மங்கையே
00
சிற்றருவி காதற் செழிப்பே
சுற்றம் பேணும் சுடரே
கற்றை இருளழிக்கும் அம்புலியே!
நற்றாய் ஆகிய பேரோளியே!
நற்றிறம் போற்றும் சந்திரனே!
00
பற்றுக் கோடுடை இரவு ஒளியே
பற்றும் மனதின் பசுந்தானவளே!
பெற்றிமையுடைய இராத்திரி இராணியே!
பொற்கிழியே! பொற்சிலையே! இன்
பொற்புடை என்னுற்ற தேவதையே!
00
வேதா. இலங்காதிலகம் -தென்மார்க்-11-6-2018

12.கவிதையுடன் பாரதிதாசன் சான்றிதழ்கள்.(பணமெங்கே பாசமங்கே.)

April -5p 2018

கவியுலகப்பூஞ்சோலை பாரதிதாசன் சான்றிதழ்கள். 12

பணமெங்கே பாசமங்கே

பேசாத பணம் பெருமைத் தொகுதி.
பேசும் பாசம் பெறுவது அவதி
பாசம் நசியும் பணம் இல்லையானால்
வாசம் இழந்து மோசமாவ துண்மை.
பணத்தை ஈந்து பார் ஒருவருக்கு
குணத்தின் தன்மையைக் குறிப்பாய் அறிவாய்.
பணம் பலரை மாற்றும் பிசாசு
பிணமும் வாய் பிளக்கும் பணமென்றால்
பணம் மனிதன் படைத்த சடப்பொருள்.
உணர்வற்ற பகட்டான உறவு ஆடை
தாண்டவம் ஆடும் தாளின் ஆதிக்கம்
ஆண்டவனையும் ஒதுக்கும் ஆளுகை யெனலாம்
இளமை முறுக்கில் பந்தம் காசோடு
இளமை முதுமைக்கு உருமாற மாசின்றி
அளவிடுவோம் பாசம் அத்தனை மாண்பென்று.
அன்பு பாசம் பணிவிடையே முதுமையில்
அளப்பரிய சொர்க்கம் அருத்தமான சொத்து.
அளவோடு காசிருந்தால் பாசம் தங்கநிலவு.
ஏழைப்பூக்களின் யதார்த்த வாசம் பாசம்.
பாழை விரித்துப் பிள்ளைகளுயரப் பண்பாய்
பாசமுயர்த்தும் கூட்டுக் குடும்ப உறவு.
வேசமற்ற பலமான வாழ்வூட்டும் பாசம்.
நேசத்தைப் பணத்தால் நிலைநாட்ட முடியாது.
காசுக்காய்ப் பாசத்தை நசிக்காது நேசிப்போம்.

வேதா. இலங்காதிலகம். தென்மார்க்.

11.கவிதையுடன் பாரதிதாசன் சான்றிதழ்கள்.

அன்பிற்கு ஏங்கும் உயிர்கள்

கவியுலகப்பூஞ்சோலை சான்றிதழ்-11

அன்பிற்கு ஏங்கும் உயிர்கள்.

சீரிழந்த அவலங்கள் நிலத்தில்
போரின் கொடுமையாம் பாதிப்பு
யாரிதைக் கடவுளும் மாற்றுவாரோ
வேரறுந்த மரமாகப் பல்லுயிர்கள்
நாரறுந்து அன்பிற்கு ஏங்குதே

00

கன்னியர் காளையரைத் தவறா

அன்னியப் பாதையில் நடத்தும்
நன்னயம் விரும்பாத எதிரிகளும்
அன்பிற்கு ஏங்கிப் பிழையான
வன்முறைப் பாதையில் செல்வோரே
00
கன்னம் கோடிடப் படலையை
சன்னலை வெறித்து நோக்கி
இன்னலுடன் முரணான பேற்றோரை
என்னமாய் எண்ணி எண்ணி
அன்பிற்காய் ஏங்கும் மழலை
00
ஆதரவு மழை வரண்டிட
நிராதரவில் கோபம் ஏமாற்றம்
ஆற்றாமை உயர்ந்து வெடிக்க
ஈற்றில் பழிவாங்கலிலும் முடிகிறது
பாறை வெடிப்பாகிறது மனப்பிளவு
00
அன்பு நிறைந்திட எங்கும்
இன்பம் பொங்கி வழியும்
புன்னகை ஊற்றாகும் உலகு
அன்பு நிறைவே இன்சொல்லாறு
வன்மை உணர்வே பகையாறு
00
அன்பொன்றே ஏக தெய்வீகம்
இன்பவூற்று மகாசக்தி வைரப்பூ
உன்னதத் திறவுகோல்! கொடுப்பதில்
அன்பில் கர்ணன் ஆவோம்!
அட்சய பாத்திரமாகட்டும் எம்மனம்!
00
வேதா. இலங்காதிலகம்-தென்மார்க் – 304-2018.

10.கவிதையுடன் பாரதிதாசன் சான்றிதழ்கள்.(வீறு கொள் பெண்ணே.)

september 3 2018

கவியுலகப் பூஞ்சோலை குழும சான்றிதழ்கள் – 10

வீறு கொள் பெண்ணே!..

*

ஆறு போன்ற உன்னோட்டம் தடுப்பார்
ஊறு செய்யவே சிலர் காத்திருப்பார்
ஏறு போல் வந்து பொருதுவார்
வீறு கொள் பெண்ணே துணிந்திடு!

*

வன்புணர்வு பாலியல் கொடுமைகளை அறிந்து
என்றுமே மௌனமாகாதே! ரௌத்திரம் பழகு!
தன்னம்பிக்கையை ஊன்றுகோலாய் எடு! உண்மையில்
உன் மையினால் பிழைகளைத் திருத்தியெழுது!

*

பெண்மையொரு மகாசக்தி அறிந்திடு! மனவயலில்
திண்மைப் புது எண்ணங்களைத் தூவு!
உன் மௌனம் நிர்வாணம்! தொன்மைக்காலமல்லவிது!
நுண்மையான அறிவாயுதம் ஏந்தி முன்னேறு.

*

பாரில் பல மங்கையர் போராடினார்
போரில் மன்னன் ஆற்காடு நவாப்பை
வீரியமாய்த் தென்னிந்திய சுதந்திர போராட்டத்தில்
தைரியமாய்ப் புறங்காணச் செய்தார் வேலுநாச்சியார்.

*

பாரதத்தின் முதற் பெண் வீராங்கனையின்
பாசக்கணவர் வெள்ளையரால் கொல்லப்பட்டார் தயங்காது
வேசமின்றி வெகுசனப் புரட்சியால் வென்றார்.
வேங்கையாவோம் வீறுகொள்வோம் வேலுநாச்சியார் போன்று!

*

23-4-2018   வேதா. இலங்காதிலகம். டென்மார்க்